Manado pe grap3 ...

Nintau karna apa masih pagi lei Tanta Min deng tanta Nona so baku ambe
baku toreba bakalae jaha momake sosereh abis abisan sampe orang orang jaga tatawa akang.
Tanta Nona batoreba kuat kuat: Eh, Min kabeo gigi kuning bibir panada kalu brani mari kaluar ngana torang dua baku tumbu,

deng gaya momaras tanta Nona so tunggu deng siaga siap mo baku hela rado punya ... maar... tunggu pertunggu tanta Min nda brani kaluar cuma jaga babataria bobalas dari dalang

Tanta Min: Eh Nona panta bebe muka kodo kita kwa nda tako pangana ,
kalu brani tunggu abis kita momasa baru torang dua baku ambe, tunggu jo di situ.

Cari tau bagini dorang bakalae karna tali timba, tanta Min pe tali timba jaga ilang turus kong dia sangka tanta Nona yang ambe sebab tutali sama deng tanta Nona pe tali timba.

Tanta Min pe badan sadiki kacili dari tanta Nona, dia pikir kalu bakalae Nona hela rado pakita bugil sudah ni dia,.. maar nda apa apa kita nda tako pa dia apa mo jadi jadilah kalu dia jual kita bili.

Padahal kote biang keladinya oom Buang gigi tungka di sablah rumah tanta Min pe birman, babadiang dia yang jaga ambe tu tali timba voor ika sapi di kobong. Karna oom Buang pe babagini sampe depe bini tanta Beki so kase tinggal pa dia, nintau so brapa tali timba yang dia da ambe beking tanta Min so ba tuduh bakalae pa tanta Nona.

Oom Utu’ tanta Nona pe laki so larang nimbole babakalae deng birman,
kalu ada salah apa-apa tanya akang deng bae-bae, nda ada guna bakalae, bakutoreba...
Tanta Nona nda skeit biar le depe laki so larang nimbole bakalae dia nda farek,

pagi-pagi kalu depe laki so pikerja, tanta Nona pigi cari hal ulang deng tanta Min karna nda mo trima bae dapa bilang papancuri tali timba.

Tanta Nona badiri tiki pinggang di luar lalu dia mulai toreba,
Eh, Min... kabeo gigi kuning ini hari kalu ngana brani... ta tumbu kase ngana pe muka biru-biru.

Dengar tanta Nona so mulai bariwayat... tanta Min balas dari dalang dapur,
Tuangali jo dengana, Nona... masih pagi bagini ngana so bakalae deng kita?
dasar nda ada hambak.
Tanta Nona; Apa ngana bilang, Min ? brani ngana kaluar ta caleg pangana,
mo tauuuu Caleg pe arti butuuulll Cabu Lego... ta mo cabu pangana kong lego kase anyor di kuala.... mangarti nganaaaa.

Tanta Min; Ohhh, ngana mo kase anyor pa kitaaa, kalu pagi-pagi, kuning-kuning yang anyor ityu ngana yang kase anyor daaang ? hehehee ....
bilang kita gigi kuning padahal diri sandiri da lebe kuning sésé éhhhh,
kalu ngana mo tau Caleg itu pearti butul Calon Lelaki Gila, mo pilih dorang pa apaaa ? pe pustema deng dorang cuma bajanji sama deng suara Esau tangan Yakub.

Dengar bagitu Tanta Nona so lebe grel depe mata so pai punya siap mo cako cakar pa tanta Min,
Apaaaa ngana bilaaang!!!??? suara Esau tangan Yakub ???? nanti kwa ngana eh, ngana basosereh pa kita?



deng akal bulus tanta Min bagara turus pa tanta Nona beking nae darah dia menyanyi turus deng suara tiga,

Merah merah rica disana
beking salah orang so pete
Kita manis lebe dari ngana
bajalang deng panta bebe,.....ahahahahaaa,...

Pica pica sudah ni dia tanta Nona so musnah depe kesabaran nda mo tunggu lama deng gaya gempur lebe jaha dari pasukan irak dia maju ka tanta Min pe pintu dapur, dia tola tu pintu mo buka maar tanta Min da kunci dari dalang
nda tunggulama deng dia skop kuat-kuat pake tenaga karate rupa di pelem pelem,..brung brang brung brang plokkkk plaaakkkk,....adddoooooohhhhh
Orekeiiiiieeeehhhh...upah dosa ialah maut,

rupa rupanya tadi karna so grel jaha tanta Nona skop tu pintu deng emosi gemilang tiada tara menuju sengsara sampe depe kuku jare mai kaki badarah riki mo tacabu.
Karna nda kuat tahang saki tanta Nona menangis deng bajalang so batimbang sebelah ,
huk huk huk huk pe moskon dengana eh Min ini kwa karna nganaa huk huk huk hukkkk,.....

Oom Buang takage dengar suara menangis lalu dia lobe dari celah dinding pitate lia kamari tanta Nona da dudu menangis beking muka asang kong ja angka depe rok seka aer mata
Oom Buang tako kalu tanta Nona deng tanta Min bakalae... nanti ada apa-apa kamari sapa mo tanggong jawab tu dia .... apalagi tanta Min pe badang lebe kacili dari tanta Nona
lia jo kwa tadi waktu tanta Nona da menangis angka depe rok seka aer mata lia depe pala-pala pe besar sama deng batang pisang goroho depe falungku persis bangkoang ... brani kenal satu kali slak Min rubuh tanpa kesan tu dia.

Tanta Min lia tanta Nona da dudu menangis lalu dia tatawa baterek ahahahaaaa itu kwa baru ngana rasa..... kalu mo mampos mampos jo kasitu, jago jago skop pintuuu nganaaa ? ahahahaaa .....skop lei dang tu kaki sebelah supaya kuku kaki tacabu lei nanti ngana pelaki kase ubah hahahahaaeee.. nda ada dosa jang tambah dosa ngana.

Tanta Min tatawa polote lia tanta Nona da ba uru ria kuku kaki so badarah amper mo tacabu karna da tendang tanta Min pe pintu dapur sandiri cari sandiri rasa e doe sayang...
tanta Min menyanyi beking tanta Nona so lebe grel maar apa daya saki dikuku rasa dijantong rasa rasa mo ta ciri.

Pulang kerja tanta Nona pe laki takage jaha lia istri tersayang so bungkus jare kaki deng verban,
depe laki tanya kiapa sampe ngana pe kaki da luka maar tanta Nona nda mo bilang karna apa tako jang dapa salah.
Maar dorang pe kanino bungsu Petu bilang, Papaaaa mama pe kaki da luka karna tadi dia da skop tanta Min pe pintu dapur.
Dengar si bungsu Petu so kase tau tanta Nona pe laki lebe takage jaha lei
dia bilang:

eh Nona.... ngana ini rupa orang nda ada hambak babakalae nda war-war skarang jadi apaaa nganaa?
pintu nda salah ngana skop akang? undang nyakit elu, deng ba aksen Jakarte tanta Nona pe laki dudu di pores bapikir nda abis abis.

Disebelah rumah tanta Min da putar lagu keras keras lagu Sarinande,
Mengapa tangis matamu bengkak
adu mama adu eh papa
asap api maso dimata

Uhhh tanta Nona dengar tu lagu rasa pica hati punya rasa rasa mo hela cako pa tanta Min maar tahang jo tunggu waktunya ta hela rado pangana begitulah tanta Nona pe dolong hati.

Bobento dikaki bulung bae butul maka situasi bakalae agak tenang selama sebulan Tanta Min pe kira tanta Nona so lupa akang mo bakubae jo kata
maar apa jadi ?? luka so bae so siap mo baku hela dan cakar garoan maka tanta Nona dola pa tanta Min deng perkara pun jadilah,
dorang dua baku hela baku cakar bagaro punya, oom Buang mo pele maar tanta Nona hantam bobale punya depe falungku besar bangkoang malontok di oom Buang pe testa beking oom buang mundur abis langkah sambil beking muka kabeo .

Rasa dapa tumbu deng dapa garo dari tanta Nona beking tanta Min so nae grel di ontak, sambil maruku dia raba batu di blakang deng depe mata tetap melihat gerik gerak tanta Nona,

lia tanta Min da maruku raba batu tanta Nona bilang,

ehhh ,,mo ba silat kwa nganaaaa ??? biar le ngana mo silat ta nda tako.

Raba bagini tanta Min pegang tu benda agak keras lombo deng dia lempar jo pa tanta Nona ,..ploookkk plakkkk ..pleeekkk,...kenal persis dipinggir mulu deng sadiki di bibir, Padahal tanta Min lia bagini bukang batu maar tai anjing yang dia da pegang tadi,
tu tai anjing belabor ditangang deng di tanta Nona pe pinggir mulu.
Ciong bobotai tanta Nona seka depe mulu kong lari karna tanta Min da dusu pa dia deng tai anjing punung ditangang.