Balada Ungke' deng Keke'

So tiga hari Ungke’ marah kras pa depe bini Keke’.

Ungke’: Say..., kalu pigi pasar bli ikang malalugis, kong beking wokublanga,neh..

Keke’: Beres say.., deng kita lei so suka skali mo makang tu barang..

Sampe di pasar, tu ikang so abis..., terpaksa Keke’ cuma bli tempe deng tahu...

kong sampe di rumah dia momasa tu tempe deng tahu campur santang.

Pulang karja Ungke’ so lapar skali.. Dia buka tu panutu saji kong lia cuma ada tempe, tahu deng krupuk,... tu woku blanga nda ada... Oooooh.. hohohouw... Ungke’ marah jaha..,

Tuangala ini Keke’.. da suruh bli malalugis ... Cuma da bli tempe...

so molai macam-macam dia....

Ungke' nda coba tu makanan terpaksa dia pi makang di luar.

Pulang di rumah deng muka maskena.. Ungke’ nda bicara pa Keke’... baku langgar nda batogor.

So tiga hari tampang maskena Ungke’ tak berubah, basuara pun nyanda.., basontong pun nyanda.., paka-paka pun nyanda.., tumbuh-tumbuh blanga juga nyanda.., apalagi mo ba kile’..., samua nyanda.. ibarat ungkapan “panci ilang de pe pantutu”.

Keke’ so beking panada... Ungke’ nda copa, so beking biapong... Ungke’ tetap nda selera..., oh weta eh...

(Keke’ pe dalang hati); ini cilaka duablas sudah kitya... kalu turus bagini bisa cere ni dia... so amper satu minggu Ungke’ nda basuara deng ba togor pa kitya,

Keke’ cari akal... di siang tengah hari jaha... ada ujang panas lei di luar... Pa Ungke’ pe muka... Keke’ beking diri pura-pura seno fugado, dia beking obor pake sumbu kaeng trigu kong taru minya tanah stengah botol kong dia bakar le tu obor....

obor manyala terang-benderang disiang hari.. depe asap itang dapa lia kental bukang maeng.. lebe jaha dari tu bemo da pake diesel...

Ungke’ ta diang dengan pandangan tafuraga...,

(depe dalang hati) ni Keke’ so seno stouw dia..., siang tengah hari jaha bagini kase manyala obor...? kalu tabakar ???

Keke’ pura-pura nentau, deng obor dia balobe kiri kanan muka blakang... di bawah kolong tampa tidor... dia bacari sesuatu maar nyanda dapa,..abis itu dia buka kas pakeang bacari deng obor... amper lei tu pakeang tabakar,

Untuk hindari bencana Ungke’ bataria;

Ungke’: Keke’yyyy .... ngana pe mata so kabur stouww?,...ngana cari apa deng obor siang siang bagini ? kalu tabakar sapa mo tanggung jawab ?

Keke’ so dengar maar dia pura pura nintau... Obor manyala so luar biasa beking Ungke’ so lebe tako.

Nda lama kamari Ungke’ datang badekat...kong dia bilang plang-plang;

Ungke’: ...Say... Kekeee’ ... ngana cari apa, sayang...?

Dengar bagitu,....deng so nyanda tahang sabar lei Keke’ bilang,...

Keke’: ....Oh Ungke’ ... sayangku.. kita cari ngana pe suara sayang... skrang so dapa.

Ungke somo polo pa Keke’ maar dia dapa lia tu obor pe api so lebe basar.. capat-capat dia ambe tu obor kong kase mati..

(Ungke’ pe dalang hati).. gara-gara malalugis kwa nidia ... amper tabakar rumah... hehehe...