Manado pe grap ...

1
Ungke, Unggu, deng Utu batamang bae skali dari kacili maar kasiang dorang tiga nintau babaca, basar di kampung riki nda pernah baskolah.
Maar biar bagitu orang dikampung nda bilang dorang biongo.

Suatu hari so dekat Natal dorang tiga belanja deng doi harga bete deng batata ubi pisang rica tomate, maklumlah dorang pe kerja cuma bakobong katu eh.
Utu so bili sabong mandi Lux satu lusin
Ungke so bli minya rambu merk Tancho 3 botol
kong Unggu bili mantega dua blek.

Lia nda ada orang, dorang tiga mulai baku tes sapa bisa babaca,
Deng sabong Lux ditangan Utu tanya pa Ungke deng Unggu sambil tangannya tunjung di tulisan Lux,

eeehhh kalu ngoni dua tau ini da tulis apaaa?

dengar pertanyaan bagitu serentak Uti deng Unggu kase jawab,

Sabong Mandiiiii.

Utu mengangguk angguk dengan senyum ria kase tanda bahwa butul tu dia .

Abis itu Unggu nda mo kalah deng blek mantega dia tunjung di tulisan Blue Band lalu dia tanya pa Utu deng Ungke,

ini da tulis apaaaa daaang ???

serentak kilat Utu deng Ungke kase jawab, Mantegaaa.

Butul skali tudia kata Unggu.

Eitsss nda tunggu lama Ungke pe bageang deng botol minya rambu di tangan dia kase tunjung di tulisan Tancho, kong dia tanya pa Utu deng Unggu,

ini da tulis apaaa daang ???

dengar bagitu nda mo kalah Utu deng Unggu langsung kase jawab,
Minya rambuuuu,


Ungke; Ahahahahaaa salah tu dia, ini baru kita tau ngoni dua pe pande
Utu deng Unggu ; Apaaaaa ?? salahhhh ??,..noh da tulis apa daaaang tu diaa??
Ungke bilang pa Utu deng Unggu,
Dengar bae bae neh kita bobaca akang Poooomaaaaddeeeee,... Pomadeee.

===================================================
2
Abis taong baru Uttu pe gigi saki luar biasa so nda tahang.
Depe eso dia pigi pa dokter gigi mo cabu akang,
maar sampe di sana so ada ampa orang da tunggu mo cabu gigi lei.

Supaya dapa layani kamuka Uttu cari akal ....
dia menangis pidis punya terpaksa tu dokter layani Uttu kamuka.

Abis cabu gigi Uttu tanya mo bayar brapa dokterrrr ?
Dokter gigi bilang bayar 350.000 pera jo

Uttu; Ah dokter,disitu da tulis kalu cabu gigi bayar cuma Rp75,000 noh

Dokter gigi ; Itu memang butul, maar tadi waktu da cabu gigi ngana bataria sampe tu ampa orang datunggu dorang so lari.
==============================================xxx

Iko pa mama lei jo.

Karna so nda tahang deng oom Endi pe beking beking tanta Betty mo minta cere.

Tanta Betty ; Eh Endi..kita so nda tahang dengana saban hari cuma ba minung.


Oom Endi ; Sapa kwa mo tahang kalu tidor ngana bale muka turus ka dinding
da kaweng deng dinding stouw ngana Betty ?

Tanta Betty ; Ah pokoknya kita mo cere,pangge tu anak anak kamari tanya dorang mo iko pa sapa.

Tu anak anak pe nama Son,Ton deng Non,tanta Betty tanya,

Eh Son kalu mama deng papa so cere ngana mo iko pasapa ?

Son ; kita mo iko pa mama jo,

Ton,kita lei mo iko pa mama

Non ; kita lei mo iko pa mama

Oom Endi ;Noh kalu bagitu papa lei mo iko pa mama.
==========================================

Tadi tadinya Chae pedagang kolombi.
Chae pata dagang lantaran pemasok kolombi cuma jaga beking bodok pa dia.
Skarang dia coba mo jadi guru SD di Paniki Bawah.

Hari pertama mengajar, Chae suru murid2 isi itu daftar riwayat idop.

Chae: "Karna kita baru di sini, ngoni isi ini riwayat hidop supaya kita kanal pa ngoni deng ngoni pe orang tua"

Murid murid ; Iyaaa engkuuu...

Meiske (murid sadiki biongo): "Engku, nama orang tua musti tulis?"

Chae: "Io, tulis yang jelas, nama deng fam"

Meiske: "Engku, alamat orang tua dang"?

Chae: "Iyo noh itu juga yang musti tulis jelas. (Chae so molai grel, dapa inga depe usaha kolombi yang bangkrut)

Meiske: "Engku, jenis kelamin dang mo tulis lei"?

Chae: "Nyanda perlu itu nda usah tulis !!! Kalu bisa Gambar akang jo!!
=================================================


Uttu mo beking rambu krol maar nda jadi jadi,
Datang kamari dia pe tamang bae nama ungke, ungke ini pe rambu krol pe bagus skali,

nda tahang kong Uttu tanya pa unkge bagimana depe cara voor beking rambu krol ?

ungke bilang ; Eh Uttu, mo beking rambu krol pe gampang skali tu dia ambe jo tu calana dalang lalu tutu akang 1 bulan stengah di kapala, maar yang bagus ambe tu lawan jenis punya.

Dengar bagitu Uttu percaya mati apa yang ungke da bilang maar dia nda brani ambe maitua punya tako dapa rako, lia tanta mince da jumur tanta mince punya di tali jemuran, lia nda ada orang Uttu maju kong dia rado akang tu calana tutu di kapala deng dia bungkus akang ba dobol deng kaeng merah supaya nda kentara kata.
Uttu pe maitua takage jaha lia Uttu so pake kaeng merah rupa orang mo cakalele sama deng opo opo da makang goraka mo basembur.

Bulung satu minggu, nyanda sabar Uttu buka tu bungkusan di kapala dia mo lia tu rambu so ba krol ka nyanda.
Ohohoouuwww,..Uttu takage jaha amper mo flao lia depe rambu somo talapas abis sisa sadiki di muka.
Lebe grel lei tanta mince toreba dari sebelah rumah,..

eh Uttuuuu ngana kira kita nintauuu ??
lebe bae kase pulang tu calana dalang kamari kalu nyanda kita lapur ngana pa kuntua, deng kalu ngana mo tau lei tu calana dalang bukang kita punya... itu oma boki punya tu dia ta da cuci akang.
===================================================================


Tadi pagi ada tabrakan di Aermadidi jurusan Batu angus Tangkoko yang memakan korban jiwa.
Akibat kelalaian sang sopir dan tak hati-hatinya si penyebrang jalan maka kecelakaan lalin itupun tak terhindari.

Ketika sang korban terkapar sekarat dijalan orang yang ingin menolong datang berbondong begitu banyak,
Akibat kerumunan orang banyak ini dan hari masih pagi belum ada pulisi sehingga Kuntua pun ambil alih maar dia sendiri sulit masuk ketengah kerumunan itu untuk melacak siapa korban tersebut.

Agar bisa di beri jalan masuk ketengah kerumunan itu maka Kuntua pun dapa akal dia bilang bahwa dia adalah keluarga korban, malumlah banyak orang nda kenal pa dia.

Maaf ..permisi..saya adalah keluarga korban coba kase jalan pakita kata Kuntua.

Mendengar ada keluarga korban yang datang maka kerumunan orang itupun memberi jalan pa Kuntua menemui sang korban yang terkulai lemas ke alam fana,

setelah mencermati ciri ciri sang korban .. alangkah takagenya si Kuntua melihat sang korban ,ternyata si korban tersebut tak lain adalah se ekor Yaki pranggang dari Tangkoko.

bila siapa yang merasa keluarga korban harap hubungi segra Kuntua tersebut dimaksud.
====================================================


Depe Sumbu

Tole deng Keke da batona so lama,
Serta so kaweng Tole mulai tunjung depe jago buka badan ba spier kase lia otot ototnya .
Pertama dia buka kameja lalu dia kase tunjung pa Keke pujaan,

Keke sayangku, kita pe dada deng spier tangan ini tangguh dan keras bagaikan dinamit 50 kg bisa pecahkan gunung batu sekalipun.

Keke cuma manggut manggut lia depe Tole da ba action to day hosa tomorrow.

Abis itu Tole buka depe celana panjang cuma tinggal deng cd saja,..

Uhuhuiii,..lia depe spier kaki deng pala pala ber otot skali luwar biyasa.

Tole bilang ; Keke sayang ? ni spier di pala pala deng bitis kerasnya bagaikan dinamit 100 kg bisa kase pica gunung besi sekalipun.

O weta eh,...Keke pe dalam hati ancor kita sudah, kalu gunung batu deng gunung besi bisa pica lalu kita mo jadi apa lei ?...tabongkar nyaku sudah ni dia.

Deng sabar sadiki pucat Keke tunggu sampe Tole buka depe cd,

serta Tole buka depe cd kamari Keke lia deng mata pai punyaaaa,...uhhhh,.... Abis itu Keke ba hura ria pe smore skali beking Tole bapikir nda bis abis.

Tole ; Eh Keke ? ngana smore bagini bulung pernah lia dang ?

Keke bilang ; Oh Tole ?? Untung bae jo sayang

Tole ; Untung baeee ??? Kiapa dang Keke ?

Keke ; Tu dinamit besar 150 kg ityu maar depe sumbu cuma kacili kang.
=====================================================================


Takupas kuli

Unggu dari kampung tinggal satu minggu di dia pe tanta Purut di Tikala.
Depe eso Unggu ba tulung depe tanta voor ba slaber beking bersih,
sementara da slaber bagini Unggu punggu kondom bekas kong dia tanya pa dia pe tanta,
Tanta, ini apaaa?

Depe tanta jawab, Ohhh itu kwa sarong sumbu,

ngoni dikampung bulung tau memadu birahi rupa ini.

Dengar bagitu deng Unggu jawab ; Iyo noh tanta biar le torang di kampung bulung tau maar nda Takupas kuli sampe bagini .
===========================================



Biar ujang keras da teru maar tole deng tamang tamang so buka baju alias bugil so telanjang bulat putih popolulu, tu baju da taru akang di bawah kolong rumah,... deng rekeng satu dua tiga ,.byuuuurrr ,..dorang lari diujang mandi balumpa babanting iko kuat bermaeng aer baku sirang sampe dorang pe burung kacili so fororo lia sama deng kukis biji biji.

Waktu Dulu dorang tole deng keke kanino bulung rasa nintau malo biar le da mandi telanjang torang nda vastiu nda rupa skarang. Ujang turung ta curah pe keras skali lia tu aer punung so banya skali sampe nda dapa lia jalang.

Beking kapal kacili dari kertas kong dorang kase anyor baku taru sapa yang lebe cepat. Baku dusu, baku polo, ba guling di aer deng blek mantega torang baku sirang balari baku iko.

Oom Buang pok pok tanta Fien pe tona da gale lubang mo beking parigi, karna tu lubang so punung deng aer dorang nintau, da baku dusu bagini deng tiga kanino tamaso di dolong lubang sampe ta minung aer pece kokehe jaha amper lida mo kaluar,

kong dapa dengar kamari ,

...Mampoooos lebe bae ngoni eh,

...oom Buang bataria pe kuat, da hati saki stouw dia karna da dapa sirang deng aer kincing tu hari,..sapa suru mo jadi pok pok ngana oom Buang.

Ambe opa Kaunang pe tali timba dorang kanino baku hela kaluar dari lubang setang putyar ityu deng dalang hati,..pe moskon dengana oom Buang,... maar,... dorang baku dusu ulang sampe dingin so totofore baru brenti.
Abis itu dorang timba aer mo spul badang deng aer parigi, kong lia orang pe handdoek... rado kamari dorang goso badang kase kring baku ganti sampe lia tu handdoek so sama deng tarapu.

Ujang masih turung,oma mien beking teh gula deng apang kong dia kase patorang, wow kaninos pe dunya sudah tu babagini karu eh.
Dudu di kadera rotang ba kutu busu dorang menyanyi balumpa sampe suara faro.
Menyanyi ulang Goyang sage ta goyang sage sampe kadera rotang ta goyang goyang ,kita dudu bagoyang badang lei ,..
da sementara bagoyang badang deng kita bataria riki mo mati ,.. nda tahang kitya karna musibah mendadak yang terjadi ini depe saki luar binasa ukur tobat punya.
maklumlah waktu ityu deng celana papo, karna tadi da dudu bagoyang riki kamari tu rotang penyaki ityu dia gepe Alo pe kanikir kacili,...uuhhhh depe rasa ngilu rasa rasa mo mata tinggi,..

dengar kamari lei oma Min so tatawa iko rame polote pica pica, Alo pulang di rumah bajalang tabuka tabuka sama deng boke da baru abis kabiri.